Featured Video Play Icon
Dani von Wattenwyls Anti-Coronavirus-Gedicht – Teil 15. (Video: Telebasel)
Basel

«Es sind mit Dir alles anderi als ahgnähmi Zytte»

Das Coronavirus hat uns fest im Griff – trotzdem gilt es, den Humor nicht zu verlieren. Ab sofort schreibt Dani täglich ein Anti-Coronavirus-Gedicht.

Corona, weisch was? Hau ab! Tag 15

Corona, e wyttere Tag mit Dir an unserer Sytte
Es sind mit Dir alles anderi als ahgnähmi Zytte

Und jetzt kunnt so langsam die schwierigi Phase
Do het me die Isolation ziemlich in dr Nase

Noch em Schock het me sich dermit arrangiert, me schickt sich dri
Es fohts afoh ah-hänge, s’wird müehsam, es närvt, das müesst nid sii

Duurehebe! Mir schaffe das! sind jetzt die Parole wo me überall duet höre
Also mache mir wytter so und löhn uns vo de negative Ihflüss nid lo störe

Dahei sii het au Guets, au wenn s’Corona unseri Bewegigsfreiheit behinderet
Ich weiss jetzt, dass bim Ziibele-schniide s’Kaugummi-Kätsche s’Brüelle verhinderet

Wenn me im Lade hungrig dur die leeri Tiefküehlzoone duet laufe
Het me jetzt dr ändgültigi Bewiis, dass keine e Pizza Hawai will kaufe

Allerdings het me jetzt au viel Zyt für dummi Idee, also blöödi Sache
Ich ha gmerkt, Mähl im Föhn duet mini Frau nid wirklich glücklich mache

Isch ihne scho mol ufgfalle, dass jetzt vieli ihri Bei zum Fänschter use-hebe
Das isch wägem Wätter, me duet die zum Brünne so quasi use-lege

Home-Office, also schaffe Daheim, kha au sie’s Guete haa
Nur dr Paul will Arbet nid Heime näh, dä isch nämlich Fürwehrmaa

Damits aber in de vier Wänd klappt muess me ufenander Rücksicht näh
Sunscht khas sii, dass dr Eint em Ander plötzlich dr Schueh duet gäh

Sie seit ihm bim goh: «Bis hütt z’Obe bisch uszoge, bi mir kasch nüme Lande»
Wenn er denn z’Obe blutt im Huusgang stoht, denn het er «sUszieh» falsch verstande

Daheim isch es am schönschte, das finde Sie sicher au, ich mach jedi Wett,
will Daheim isch doch dört wo me ufem WC e funktionierends W-Lan het

Und ich weiss jetzt, wie me 1200 Kalorie verbrennt, mit nume eim Ässe
Ich ha nämlich geschter mini Lasagne im Ofe wägem Färnseh total vergässe

Mir sind übrigens alles gueti Mensche, wenn mirs grad vo Kalorie hän
Will mir de Kilojoules und Kalorie in dene schwere Zyte e Daheime gän

Aber über eins do könne mir würklich glücklich sii, wie ich also find
Dass «die Zeugen Jehovas» noni gmerkt hänn, dass mir jetzt alli daheime sind

Schreiben Sie einen Kommentar

Ihre E-Mail-Adresse wird nicht veröffentlicht. Erforderliche Felder sind mit * markiert.

*